Вечерва во 20 часот на платформата од ГТЦ кон паркот „Жена борец“ ќе се одржи четвртиот по ред настан под мотото „Го сакам ГТЦ“ по втор пат во обликот ГТЦ Форум.
Досега како говорник на ГТЦ ФОРУМ е најавен режисерот Александар Поповски, внук на архитектот на ГТЦ, Живко Поповски.
„Мислам дека се греши со уништувањето на различноста по секоја цена. Власта не мора баш толку многу да остварува. ГТЦ е белег на едно време. Тоа е како мене да ми кажете ќе ти ја прережирам претставата малку по класично. Зошто? Направете си нова претстава“, изјави Поповски во интевју за НОВА, кое ќе можете да го проследите 18 часот.
Во текот на денот на Facebook страницата на Асоцијација на архитекти на Македонија ќе се обновува листата на потврдени учесници. Како и претходниот пат, во дискусијата слободно ќе можат да се вклучат и сите граѓани кои сметаат дека за овој проблем треба да се разговара јавно.
На овој собир ќе продолжат стандардните активности:
• собирање потписи за петицијата за зачувување на ГТЦ во неговата автентична физичка состојба;
• пишување мислења за самиот ГТЦ: „Зошто го сакам ГТЦ?;
• пишување пораки, идеи и препораки до архитектите на новата псевдоисториска фасада и до управата на ГТЦ;
Дополнително, ќе бидат јавно прочитани отворените писма до надлежните и ќе биде изложена и отворена за дискусија измената и дополната на Деталниот урбанистички план за Мал ринг од декември 2012г.
„Трансформацијата и еволуцијата на градот се логични и неизбежни, но ретко носат вакви проверени позитивни примери како Градскиот трговски центар кои создале нова вредност, но истовремено го испочитувале постојното. Било какви измени на вака важни објекти за историјата, културата, за функционирањето на еден град, треба да се прават многу внимателно без да се наруши основниот концепт на авторот и со задржување на неговите суштински вредности. Имаме историска обврска да реагираме“, велат од Асоцијација на архитекти на Македонија.