Поранешниот романски премиер Адриан Настасе е осуден на четири години затвор поради земање поткуп.
Одлуката на Врховниот касациски суд е конечна, а Настасе за кратко време се очекува да биде пренесен во затвор. Таа е донесена по делото, познато под името „Замбакчан“ откако Националната дирекција за борба против корупција во Романија ја обжали пресудата на Настасе за овој случај, изнесена во март 2012 година.
Тогаш, поранешниот романски Премиер беше осуден на три години условна казна за уцена и беше ослободен од обвинението за земање поткуп.
Романскиот суд денеска ја осуди и сопругата на поранешниот премиер, Дана, на три години условна затворска казна за истото дело.
Судот, исто така, одлучи на брачната двојка Настасе да им бидат конфискувани и околу 450.000 евра.
Според обвинението за делото „Замбакчан“, Настасе во функција на премиер во периодот од 2002 до 2004 година стекнал корист во вредност од околу 630.000 евра.
Во јуни 2012 година Настасе беше осуден на две години затвор за незаконско финансирање на неговата предизборна кампања за претседателските избори во 2004 година со два милиони долари од државниот буџет.
Тој се застрела во вратот кога полицијата пристигна во неговиот дом за да го притвори, но сепак одлежа една третина од казната и беше предвреме ослободен на 18 март 2013 година, имајќи ги предвид неговата возраст и доброто однесување.