Четврта недела по ред поранешните вработени од Охис излегоа на мирен протест пред Владата со надеж дека нивните барања ќе бидат сослушани од премиерот Никола Груевски или некои од министрите.
Исплатата на 24 плати од државниот загубар која тие ја бараат, велат може да се реши со стопирање на некои од мегаломанските проекти на Владата.
– Секој вторник сме тука и му даваме време од една недела да најде 5-10 минути за нас, гледаме преку медиумите дека насекаде е ангажиран, само за нас нема време,се пожали пред камерите на медиумите, Тина Петковска, поранешна вработена во Охис, дополнувајќи дека доколку не може премиерот, може некој од своите соработници да испрати да разговараат како луѓе за нивните проблеми.
Луѓето кои и денес се појавија пред Владата потенцираат дека во денешно време е многу тешко да се живее со една неисплатена плата а со 24 е пак незамисливо.
Присутните пред Влада најдоа забелешки во патувањата на премиерот низ Македонија, а велат тоа го гледаат од тв екраните.
– Тој се прави народен човек а од нас бега веќе подолго време… Тој наоѓа време да оди по сите села а ние овде дома му дојдовме…јас не знам од што се плаши, ние сме луѓе, вели еден од поранешните работници во Охис.
Тие порачаа дека кога може да се трошат пари за тркала и за споменици, може да се оддели мал дел за да се реши и нивниот проблем, бидејќи се работи за многу семејства погодени од долгот кој очекуваат да им биде платен.
За крај ги повикаа сите работници од сите фабрики низ Македонија, кои останале на улица да дојдат идниот вторник во 10 часот пред објектот на Владата во Скопје, со надеж дека тогаш, во поголем број, ќе бидат сослушани од премиерот.
За Охис последниве години распишани се десетици обиди за продажба, но сите без успех. Министерот за економија Беким Незири, неодамна рече дека Владата е запознаена со состојбата, но не е планирана исплата бидејќи се уште за фирмата не може да се најде купувач.