Претседателот на САД, Доналд Трамп ја нападна градоначалничката на Сан Хуан во Порторико, Кармен Круз дека е слаба лидерка, отако таа ја критикуваше Белата куќа дека не се грижи доволно за иднината на луѓето на овој остров.
„Градоначалничката на Сан Хуан, која пред само неколку дена делеше комплименти, сега добила наредба од Демократите да биде безобразна кон Трамп. Тоа е слабо лидерство од неа и од другите во Порторико, кои не можат да обезбедат помош. Тие сакаат се други да им направат, кога треба заедницата сама да си помогне“, порача Трамп во серија твитови преку социјалната мрежа.
Според него, американската администрација беспрекорно помагала во опоравувањето на Порторико по катастрофалниот ураган Марија, потенцирајќи дека 10.000 луѓе од федералната власт помагаат, откако како што вели тој, Порторико бил целосно уништен.
Порторико, држава во која живеат 3.4 милиони луѓе се справува со хуманитарна криза, во која милиони се оставени без струја и вода. Досега починаа 16 луѓе, за што потврдија властите, но се стравува дека бројот може да порасне бидејќи се уште нема конкретна проценка на штетите.
Трамп ја критикуваше Круз пред неговата посета во вторник следната недела кога треба да се сретне со гувернери на островот.