Со богата уметничка биографија, младата и талентирана Јованка Попова е куратор, теоретичар на културата, со неколку функции во моментов: извршен директор на Јадро-Асоцијација на независната културна сцена, програмски координатор на Проектниот простор Прес ту егзит, потоа член е на интернационалната асоцијација на уметнички критичари AICA International, и дел од управниот одбор на македонската секција на AICA Македонија – здружение на ликовни критичари, историчари на уметноста и кустоси кои дејствуваат на полето на модерната и современа уметност.
Магистрирала на Институтот за Историја на уметноста, насока – современа уметност на Филозофскиот факултет во Скопје. На истиот институт, била ангажирана како демонстратор по предметот “Македонска современа уметност”.
Соработувала на повеќе научни и истражувачки проекти од областа на историјата на уметноста. Учествувала на неколку меѓународни конференции и симпозиуми и одржала презентации и предавања на Humboldt University, Central European University во Будимпешта, Goethe University, Франкфурт, Hankuk University of Foreign Studies, Сеул, Kunst Historisches Institut, Фиренца, Bahcesehir University, Истанбул, Trondheim Academy of Fine Arts и други. Автор е на повеќе текстови и предговори во каталози од областа на современата уметност и ликовната критика.