Потребни се стратегии што ќе спречат одлив на мозоци и ќе овозможат зголемување на вработеноста на младите, ова е заедничка констатација на парламентарките Тања Томиќ од СДСМ и Ермира Мехмети Деваја од ДУИ.
Младите политичари денеска дебатираа за невработеноста и одливот на мозоци и решенијата за спречување на овој тренд. Претставници на политички партии од 15 активни младински организации во земјата учествуваа на дебатата организирана од страна на Институтот за економски стратегии и меѓународни односи ОХРИД, јавува МИА.
За Тања Томиќ од СДСМ дебатата е добра можност за политички дијалог меѓу подмладоците на политичките партии, она што, како што рече таа, тие го нарушиле.
Според неа, освен за невработеноста и одливот на мозоци треба да се разговара и за миграцијата на работната сила внатре во Македонија. Многумина, вели таа, бараат начин како да заработат, се повеќе и во арапскиот свет. Одливот на мозоци според неа е поврзан со доброто образование и секако добрите плати, но и условите за работа.
Предложи неколку решенија како долгорочна, правна и институционална рамка, креирање база на податоци на експерти како од Македонија така и за Македонци кои работат во странство и комплетна државна стратегија за младите.
За Мехмети Деваја од ДУИ одливот на мозоци се предизвикува од економски и политички причини и младите бараат подобра заработувачка. И сево ова нема врска со една или со друга влада или коалиција. Тоа е социјален тренд што загрижува, вели таа. Во Македонија треба да се воспостави политика која ќе гарантира реална, независна пазарна економија ослободена од политика.
– Ова ќе не направи поконкурентен пазар. Потребна е реформа на јавната администрација во смисла таа да се ослободи од политички влијанија и да не биде главниот работодавач на младите луѓе, изјави пратеничката од ДУИ.
Но, според неа, главната задача за решавање на невработеноста на младите и одливот на мозоците и одговорноста останува на владите без разлика која политичка гарнитура е на власт.
Отворање на работни места во секој град и спречување на миграцијата на младите е еден од предлозите што беше посочен од Бојан Бошковски, член на Младинската организација на Демократскиот сојуз.
Слободанка Алексовска од Унијата на млади сили на ВМРО-ДПМНЕ вели дека целта на владејачката партија и на Унијата е на младите да им се предочи дека нивниот личен успех е успех и на државата и дека нивното место е во Македонија. Според неа, ситуацијата е променета, а претприемништвото го посочи како еден од начините и можностите за вработување односно самовработување на младите луѓе.