Јавното претпријатие „Паркинзи на Општина Центар“ денеска ја поддржи иницијативата за привремено згрижување на бездомни кучиња, како на територија на општина Центар, така и во останатите општини во Скопје, информираат од претпријатието. Од претпријатието апелираат сите жители што се во можност да ја поддржат иницијативата со тоа што барем привремено ќе згрижат бездомно животно од улиците на Скопје.
„Изминатиот период неколку здруженија за заштита на животните и нивните активисти објавија дека се очекува да има заловување на бездомните кучиња во Скопје со цел да се исчисти градот од бездомни животни до Суперкупот кој треба да се одржи на 8. август. Тие ја искажаа својата загриженост за иднината на тие заловените кучиња, со оглед на тоа дека ги има многу, а капацитетот за нивно згрижување е мал. Сите заедно и со малку напор можеме да направиме многу за четвороножните пријатели и да помогнеме да ни биде чист градот за гостите што ќе не’ посетат“, велат од претпријатието.
Секој што сака да се вклучи во оваа акција, треба да направи фотографија со кутрето и истата да ја објават на својот профил на социјалната мрежа „Фејсбук“ со хаштаг ЗаедноДоСуперКуп.
„Да покажеме дека заедно можеме да направиме многу“, апелираат организаторите на акцијата.