Да се биде лустриран, како тоа гордо звучи! Последната вест, иако неофицијална, доаѓа директно од кулоарите на Министерството за лаги и манипулации, каде припаѓа и џелатската Комисија за лустрација. Пресудата е донесена- ќе бидат лустрирани и новинари!
Досега бевме предавници, странски платеници, одметници, непријатели на оваа власт. Мала група дисиденти- новинари, професори, активисти, по некој уметник и судија (единствената е Наташа Габер)- кои не можевме да бидеме ништо друго освен бунтовници, катализатори на општествените и политичките промени, да делуваме еднакво на начин, како што е пишувана политичката историја на земјите кои само со вакви прогресивни движења се демократизирале. Некои пред некој век, некои пред 50-тина години, оваа земја денес. Преку нашата ненасилна, низ историјата многу често препознаена како нежна револуција.
Сите оние кои не можеме да завршиме како Никола Младенов и Томислав Кежаровски (премногу ви е комплицирано, откако светот се крена на нозе и бевте приморани да криете докази за Никола, а подоцна и да го ослободите Томче), сите низ годиниве сме фрлани во занданите на груевизмот каде со чекан сакате да ни ја обликувате свеста и да произведете страв. Ништо повеќе, само страв. Да се исмевате и смеете грлато како Груевски за Фијат Цановски на лентите, кога му го рушеле Космос: ” Се п…. Му тече низ пантолони, преплашен е, хахаха”. Затоа што вие не се водите од срамот, туку водите со сеење страв.
Свртете ги наназад страниците на историјата, и застанете на 1977 година. Тогаш кога е пишуван Чартерот 77, петицијата на неколку чешки интелектуалци и писатели, кои му обзнануваат на светот со каков терор се соочени во својата земја, преку грубо кршење на човековите права, преку сеење страв на граѓаните, преку деспотската власт која жестоко се пресметува со дисидентите.
Кадифената револуција на Чешка го произведе Чартерот 77: да се послужам со зборовите на Вацлав Хавел кога се опишува себеси и своите другари- “ексцентрик, како будала, Дон Кихот, и на крајот кон него стекнуваат аверзија, како и кон сите кои се однесуваат различно од останатите, на начин кој се заканува да го закачи огледалото на критиката пред нивните очи.”
Таа власт против која се кренаа Хавел и уште неколкумина, еднакво како и оваа денес во Македонија, ги нарекуваше предавници, платеници, одметници, непријатели на државата. Таа власт тогаш го одбра распаѓањето на државата и тивката смрт на сите останати, на сите преплашени и покорени, за да можат тие да опстанат, наизглед недопрени во моќта, да го парафразирам Хавел- тогаш кога со отворено писмо до Густав Хусак се обидува да ги отвори ширум затворените очи на сите оние кои прогласија мртовечница во земјата.
Затоа, ве покануваме да започнете да лустрирате и новинари. Тоа е ништо повеќе- само знак дека сте преплашени од бунтовниците, неконформистите, пркосните. Од сите нас кои со години одбиваме да ја претворите земјава во гробница на стравот, за што вие исклучиво имате одговорност, но тоа е тема која допрва ќе ја осознаете.