Кутии со храна, облека и лекови – ваква помош македонските граѓани најчесто донираат за помош на украинското население.
Претпладнево го посетивме новоотворениот пункт на плоштадот Македонија, бел шатор со написи „Хуманитарна помош за Украина“ каде разговаравме со двајца претставници од Здружението на Украинците во Република Северна Македонија „Лејса Украинка“. Во меѓувреме, случајни минувачи застануваа да прашаат што е потребно за помош на украинското население.
Од Здружението се заблагодарија на хуманоста на граѓаните и ги повикаа да донираат кој колку може.
„Да им помогнеме на нашите браќа во Украина. Милиони Украинци останаа заглавени во воениот конфликт, засолнети во скривници, во метро станици. Секоја помош е добредојдена“, велат од „Лесја Украинка“ и додаваат дека донацијата која секојдневно се собира на плоштадот Македонија, на крајот од денот се носи во главниот магацин во населбата Ѓорче Петров, каде исто така има пункт за донации.
На самиот пункт е поставена листа со сите потребни намирници.
Покрај облека и обувки, машки женски и детски како и термо долна облека, се бараат и ќебиња, јоргани, постелнини и свеќи.
Најголема потреба во моментов има за храна се освен растително потекло) и вода и тоа масло, шеќер, брашно, конзервиран грашок и пченка, житарици и гриз, ориз, грашок, тестеници, квасец, колачиња, маргарин за печење, бонбони, вафли, паста од домати, кечап, џем, какао, кафе, чај и конзервирана храна. Потребни се и садови за јадење и пластични садови за една употреба
Во списокот се наведени и шатори, душеци, вреќи за спиење, светилки, батерии и акумулатори. Средства за лична хигиена, женски влошки и детски пелени.
Покрај ова, на граѓаните кои се засолнети од воениот конфликт им се потребни и детергенти, како средство за дезинфекција, средство за миење садови, течен сапун, паста и четки за заби, тоалетна хартија, крем и сечила за бричење и кеси за отпад.
Од Здружението „Лејса Украинка“ апелираат до хуманите граѓани и компании да донираат генератори, инвалидски колички за деца и возрасни, болнички кревети, биотоалети, кревети на расклопување. Потребна е и војничка опрема, тактички ранци и суви војнички оброци, мобилни телефони, лаптопи, токи-воки и радиостаници.
Се бараат и лекови и медицински производи, кои мора да бидат запакувани во кутија за прва помош и тоа, завој, фластер, медицински ракавици, парацетамол од 500мг и други медицински средства.
Покрај горе наведеното, хуманите граѓани може да донираат и парични средства кои ќе се искористат за набавка на потребните намирници и продукти, велат од Здружението.
Пунктот на Плоштадот Македонија е отворен секој работен ден од 8 до 20 часот.
Сите информации околу испраќањето хуманитарна помош за Украина, граѓаните можат да ги добијат на бројот 071 755 818.
(Б.Б.)