Самостојниот синдикат на новинари и медиумски работници (ССНМ) на трети мај, Меѓународниот ден на слободата на печатот ги повикува на затемнување на веб-страниците во знак на протест поради опасните тенденции со нов закон за медиуми да се внесе информативен мрак на интернет!
“Со аргументи дека ќе се воведе ред во онлајн медиумската сфера со новиот закон ()доаѓа сериозна опасност за политичка контрола, селекција, лиценцирање и цензура на онлајн медиумите”, се вели во повикот на ССНМ.
-Советот за човекови права при Обединетите нации правото на слободен пристап до интернет го смета за човеково право , а ние се соочуваме со озаконување на цензурата, покрај фактот што во членот 16 од Уставот на РМ изрично се вели: „Цензурата е забранета со закон“.
ССНМ аргументира со фактот дека интернет просторот никаде во демократските земји не е регулиран токму поради опасносите од широка цензура во тој простор.
“Интернетот е неограничен ресурс за кој не важат државните граници и апсурдно е нашата држава да се обиде да регулира нешто што е глобална цивилизациска придобивка,” се вели во соопштението.
-Нагласуваме дека насоките во Европската директива за аудиовизуелни медиумски услуги кои се користат како аргумент за предлог законот, се однесуваат пред сè на радиодифузерите, а не на интернет медиумите.
-Детектираните проблеми во онлајн медиумската сфера е можно да се решат со спроведување на веќе постоечките закони (Закон за авторско право, Закон за граѓанска одговорност за клевета и навреда и т.н.), со интервенции во нив или со саморегулација во рамките на медиумската заедница.
ССНМ ги повикува сите интернет медиуми утре, на трети Мај или денот на слободата на печатот да ги затемнат своите страници 24 часа со што ќе покажат дека не се согласуваат со предложената регулатива.
“Станува збор за генерирање темна страница со текст:
ПРОТЕСТ!!!
На Денот на слободата на медиумите 3 мај (името на веб страната) ги затемнува содржините во знак на протест поради опасните тенденции со нов закон за медиуми да се внесе информативен мрак на интернет!
Доколку ви се потребни повеќе информации и доколку се приклучувате кон нашиот протест Ве молиме да не информирате на овој маил затоа што списокот на порталите што ќе бидат затемнети ќе биде доставен до агрегаторот time.mk.”, информираат ССНМ.