Сите локации во деталните урбанистички планови кои ги носат општините, а чија намена е изградба на домови за стари лица или детски градинки ќе се продаваат со почетна цена од 1 евро за метар квадратен. Субјектите кои стопанисуваат со земјиштето треба да ги намалат комуналиите за овие два вида објекти за 95 проценти.
Ова е предвидено со двата нови подзаконски акти кои ги донесе Владата за поттикнување за приватната иницијатива од областа на социјалната политика, односно можност за реализација на инвестиции во областа на изградбата на домови за стари лица и приватни детски градинки.
– Овие уредби се задолжителни за сите субјекти кои стопанисуваат со земјиштето без разлика дали тоа е централната власт или единиците за локална самоуправа, истакна Ѓорѓиев.
Според Ѓорѓиев, предвидени и четири поволни кредитни линии кои се реализираат преку Македонската банка за поддршка на развојот. Првиот е општата кредитна линија од Европската инвестициска банка, за обезбедување на финансиски средства со камата што ја субвенционира државата, а изнесува 5, 5 проценти.
Вториот кредит, е преку италијанскиот револвинг фонд што работи во соработка со Македонската банка за поддршка на развојот, третиот инструмент обезбедува кредитен фонд со гарантна шема кога државата учествува со поголема гаранција за повратот на средсвата од страна на приватниот субјект.
Четвриот, е кредитната линија за мали и средни претпријатија, чија предност е тоа што средствата можат да се добијат во денари, за разлика од останатите каде што средствата се пресметуваат во добивна вредност.
Портпаролот на Владата посочи дека и Агенцијата за вработување има предивдено средства кои можат да значат одреден придонес или субвенционирање на вработувања на лица кои потенцијално би работеле во овие домови или детски градинки.
Ѓорѓиев посочи дека досега за изградба на приватни детски градинки во ДУП на општините се предвидени 23 локации ширум Република Македонија, како и 14 објекти кои би можеле да бидат искористени за оваа намена. За домовите за стари лица се утврдени 35 локации ширум земјава и се лоцирани околу 50 – тина објекти за оваа намена.
Досега, имал над 40 правни субјекти заинтересирани за изградба на приватни детски градинки и над 60, за инвестиција за приватни домови за стари лица.