Засилен е интересот за вакцинација во трите Поликлиники во Скопје. Стотици повозрасни граѓани сами или со придружба од рано наутро чекаат пред портите на вакциналните пунктови. Уште од рани зори, 6.30 наутро, првите пациенти се редат пред влезот на Поликлиниката Јане Сандански, раскажува за НоваТВ раководителот на Поликлиниката, Боре Радевски. Дневно само на овој вакцинален пункт се имунизираат над 730 граѓани, најголем дел од нив во старосната група над 70 години.
“Секојдневно се случува на пунктот да дојдат повозрасни граѓани кои го пропуштиле својот термин од пред неколку дена. Нив не ги враќаме. Има и пациенти кои на закажаниот термин за вакцина ќе се пожалат дека се настинати, со затна нос или кашлица. Докторите ги советуваат да дојдат друг ден. И тие граѓани ги примаме без термин да се вакцинираат откако ќе им се подобри здравствената состојба. Секој ден на овој пункт имаме закажано околу 600 вакцинирања преку системот Мој Термин, но имунизираме и по 740”, вели Радевски и додава оти за сега не се предвидени т.н. отворени данови за вскцинација на сите заинтересирани граѓани, но не ја исклучува можноста тоа да се случи кога во Македонија ќе пристигне поголема количина на вакцини.
Докторите признаваат дека огромен е интересот за вакцинација со кинеската вакцина “Синофарм” и дека во деновите кога оваа вакцина се аплицира бил најголем притисокот пред вакциналните пунктови. Сепак, се уште кај мал дел од повозртасните постои скептицизмот кон оксфордската вакцина, велат докторите.
“Има и такви кои откако ќе се информираат дека дента боцкаме само Астра Зенека прашуваат дали може да се вратат друг ден. Но, тие се многи ретки. Граѓаните веќе знаат дека оваа вакцина е безбедна и со многу висока заштита. Кај нас во Македонија нема ниту еден случај на поврзаност на оваа вакцина со било какви промени во коагулацијата” , вели доктор Даниела Николовска Христова.
Од Здравствен дом Скопје, за НоваТВ велат дека на трите вакцинални пункта во Скопје, во Поликлиниките “Јане Сандански”, “Букурешт” и “Чаир” дневно се вакцинираат и по 1700 граѓани.
Билјана Божиновска