Семејствата на повредените патници во автобуската несреќа кај Ласкарци од утринава веќе можат да ги посетат своите најблиски во Градската болница „8 Септември“.
Азир Сефули чекаше во холот на Болницата за да го види својот син, 19 годишен студент на Архитектура кој е меѓу повредените патници што се згрижени во оваа болница.
Тој вели дека предност на посета имале роднините на патниците кои се потешко повредени.
– Мојот син има 19 години. Беше во автобусот на „Дурмо турс“ со кој секојдневно патува. Штом слушнав за несреќата веднаш дојдов во „8 септември“. За среќа, нема сериозни повреди. Се слушнавме телефонски и тој ми кажа дека одеднаш возачот на автобусот изгубил контрола и последно на што се сеќава е дека почнале да се превртуваат. Ништо повеќе не знаеше да ми каже. Важно е дека е добро, вели Сефули.
НОВА разговараше и со Ридван Бајрами, специјалист по дигестивна хирургија, раководител на Одделот. Ни рече дека вече 27 часа е на работното место.
-Ноќта беше стресна и тешка. Веднаш штом го добивме повикот од Брзата помош, сите беа повикани на работа: анестезиолози, специјалисти трауматолози. Во болницата беа присути повеќе од 90 проценти од целиот медицински кадар на болницата, вели Бајрами.
Во оваа болница се примени се 37 пациенти. Шестмина починале, четворица се и натаму во критична состојба. Последната операција е направена во 1 часот по полншќ и траела до 3 часот.
Од се што се случувало минатата ноќ, Бајрами како шокантен издвои еден, на млада 20 годишна девојка која дошла во Болницата конатктибилна и свесна.
-Ја примивме и со неа разговаравме. Одеднаш ситуацијата и се влоши и поставивме индикација дека има внатрешно крварење. Ја опериравме и имаше крварење во слезината. Операција заврши добро и таа е во стабилна состојба, рече Бајрами.
Од „8 септември“ велат дека засега располагаат со доволни резерви на крв и други материјали, како и со медицински кадар.
Се очекува денеска, најдоцна утре да заврши увидот на местото на несреќата, по што првично ќе се знаат причините за оваа најголема сообраќајна трагедија во земјава. Возачот е еден од повредените, но е пуштен на домашно лекување. Со него енаправен разговор.
Денеска и утре е ден на жалост.