Истрагата за загинувањето на новинарот и сопственик на „Фокус“, Никола Младенов ги врати вештите лица повторно на местото на настанот, по барање на истражниот судија, изјави за НОВА Владимир Туфегџиќ, портпарол на Кривичниот суд.
„Четири фискални сметки од наплатните рампи се доставени до крим – техника“, информира Туфегџиќ. Но, останатите материјални докази не се побарани од главната уредничка на Фокус Јадранка Костова, која за НОВА изјави дека нашла делови од автомобилот на Младенов.
Истражниот судија наредил дополнителна анализа на местото на загинувањето на Никола Младенов на сообраќајно техничко вештачење што подразбира неколку аспекти: анализа на местото на настанот, местото на ударот и движењето на возилото, додека посебно вештачење не е побарано од страна на истражниот судија.
Туфегџиќ за НОВА вели дека истражниот судија не побарал анализа на возилото Мерцедес од страна на германски експерти, со оглед на фактот што се работи за тамошно возило. Тој најавува прес-конференција за 2-3 дена, кога ќе бидат соопштени сите официјални сознанија и податоци.