Позитивната листа на лекови се уште не е променета и во неа нема нови лекови иако министерот за здравство Венко Филипче пред година и половина најави дека ќе ги укине 14 комисии за ревидирање на листата воведени од екс министерот Тодоров.
Пред точно четири месеци пак, Филипче излезе со изјава во Влада дека со заштедата од намалување на цените на околу 550 лекови(генерички и иновативни) ќе обезбедат буџет со кој понатаму ќе ја прошират позитивната листа на лекови. Филипче тогаш рече дека цените се намалуваат од 40 до 50 отсто, а вкупната заштеда на годишно ниво ќе биде над 2 милиони евра.
Тој рече дека заштедата кај генеричките лекови на годишно ниво изнесува 993.000 евра, додека кај иновативните лекови изнесува 1.388.600 евра или вкупно 2.381.600 евра.
„За компарација во 2016 година вкупната заштеда кај оригинаторните и генеричките лекови изнесувала 1.126.000 евра, а во 2017 заштедата изнесувала 398.315 евра“, изјави Филипче на 29 март 2019 година.
Но, досега ниту комисиите се сменети, ниту Министерството за здравство излегло со анализа како тоа ќе го постигне, а нема ниту информација колкава е заштедата досега и што со неа понатаму.
Во Министерството за здравство велат дека во собраниска процедура е Предлог-законот за изменување и дополнување на Законот за здравствено осигурување.
„Во него е предвидено да се формира една комисија за позитивна листа, наместо досегашните 14 комисии. Откога ќе се донесе Законот, ќе се формира комисијата. Подготвени се подзаконските акти за утврдување на критериумите и методологијата, согласно која ќе се прави изборот на лековите што ќе бидат ставени на позитивна листа. Планирано е најмалку еднаш годишно да се проширува позитивната листа на лекови со нови генерации на лекови“, одговорија за НОВА во Министерството за здравство.
Ова значи две изгубени години, а додека се направи сето тоа и повеќе и голем удар за пациентите кои немаат можност да се лекуваат со современи лекови или пак се принудени да си купуваат, коментираат за НОВА во лекарските кругови, кои пак со ова се оневозможени да применуваат медицина базирана на докази.
„Многу лекови кои одамна наоѓаат примена во соседните земји ние не можеме да ги препишеме на рецепт, туку им препорачуваме на пациентите да си купат. Иако некои од нив можеби и не се премногу скапи има луѓе што не можат да ги купат. За скапите и да не зборуваме. А, правото на лекување е Уставно загарантирано за секој граѓанин“, потенцираат лекарите.
Позитивната листа на лекови не е промената повеќе од една деценија и во неа се наоѓаат многу застарени лекови кои веќе се исфрлени од употреба во другите земји,а нови нема. Ревидирање на листата и внесување на нови лекови беше еден од приоритетите на оваа власт.
Од друга страна, проблемот со лековите кои ги снемува во првите денови од месецот останува и понатаму. Вчера на собраниска говорница, одговарајќи на пратеничко прашање премиерот Заев изјави дека причината за ваквата состојба се фиктивни фактури кои биле издавани во аптеките со што, како што рече, се тргувало со лекови. Тој најави дека најдоцна до почетокот на октомври ќе се најде решение за оваа состојба и дека анлизите се во тек.
„Фиктивни рецепти се издавани некаде и со лековите се тргува, ние правиме сериозни истраги. Но, малку и психолошки е тоа бидејќи граѓаните да не останат без лекови уште на 1.ви чекаат за земат лекови и трупаат цели аптеки дома, а на крај ги фрлаат. Граѓаните треба да добијат лек во било кој ден од месецот, некои лекови некогаш живот и значат. Затоа државата мора рационално да управува и од 1.ви септември до 1.ви отомври ќе бидат готови анализите и ќе се знае какво решение ќе се најде. Целта е граѓаните да имаат лекови во текот на целиот месец“, рече премиерот Заев.
ФЗОМ и претходно најавуваше дека се тргува со лекови во аптеките но, цели две години проблемот со квотите и недостигот на лекови на рецепт во текот на месецот не е решен.