Пратениците во грчкиот Парламент од редовите на десничарското движење „Златна зора“, Јоргос Герменис, Панајотис Илиопулос и Статис Букурас, денеска се појавија пред судот за прекршоци во Атина, под обвинение дека управувале со криминална организација.
На тројцата пратеници од ова движење, за кои властите тврдат дека делува како криминална организација, претходно им е одземен имунитетот како пратеници во Парламентот.
Вкупно девет од 18 пратеници на „Златна зора“ се соочуваат со обвиненија за учество во криминална организација, а меѓу нив се и лидерот на партијата Никос Михалолијакос и двајца пратеници кои се наоѓаат во затвор.
Подигнувањето на обвинението против членовите на „Златна зора“ започна откако во август беше убиен музичар, со антифашистичко определување. За убиството на музичарот е обвинет еден припадник на „Златна зора“.