Уставниот суд со години наназад е под силно партиско – политичко влијание и тоа ќе продолжи бидејќи поставеноста или начинот на избор на судии не дава гаранции дека тие ќе бидат судии со силен личен кредибилитет и дека ќе ја ценат уставноста и законитоста, смета пратеникот Павле Трајанов, кој денеска на Комисијата за избори и именувања на која тече расправата за избор на тројца од предложени девет судии ја истакна потребата за реформи на судскиот систем, а пред се на Уставниот суд и неговата улога и поставеност.
-Начинот на кој што се води целокупната постапка е за дискредитација на предложените кандидати за уставни судии, а не за нивна афирмација, рече Трајанов кој се осврна на проблемот на партизацијата на Уставниот суд која според него не е карактеристична само за актуелниот состав.
Ваквите забелешки на пратеникот Трајанов следеа откако пратеници од ВМРО-ДПМНЕ и од СДСМ разменија ставови за кандидатите професорката Родна Живковска, предложена од опозициската партија и за Љубомир Јовески, предлог на власта, со обвинувања дека и двајцата кандидати се исполитизирани, првата наводно поради партиска донација, а актуелниот обвинител поради селективен пристап во борбата против корупцијата и криминалот. Пратениците во своите дискусии зборуваа и за нискиот процент на доверба на судството кај граѓаните.
Опозицијата обвини дека со судии како актуелната претседателка на Уставниот суд Кацарска и предложениот Јовески ниту ќе се подобри сликата за партизираното судство, ниту ќе се врати довербата, а пратеници на владејачкото мнозинство такви сомнежи искажаа спрема предлогот професорката Живковска да седне во едно од трите столчиња во Уставниот суд.
Пратеникот на ВМРО-ДПМНЕ Антонио Милошоски и постави прашање на претседателката на Комисијата Марија Георгиевска во врска со информација дека минатата година пристигнала апликација за кандидатура од судијката Антоанета Димовска за член на Уставен суд, и праша зошто оваа апликација била скриена од пратениците. Георгиевска рече дека нема таква информација и најави дека откако ќе ги провери наводите во собраниските служби, дополнително ќе ги информира пратениците.
Уставниот суд додека не се изберат тројца судии работи во нецелосен состав, откако им истекоа мандатите на тројца судии – Сали Мурати, Елена Гошева и Никола Ивановски. Кон средината на јануари годинава, пак, му заврши мандатот и на судијата Јован Јосифовски.
С.М.