На денешен ден, 13 јануари 1898 година, славниот француски романсиер, новинар, книжевен теоретичар и социјален критичар Емил Зола го објавил својот напис во веникот „Л’Орор“ под наслов „Обвинувам“.
Во своето отворено писмо до претседателот на француската Република ја обелоденил аферата „Драјфус“, обвинувајќи ја француската влада за монтираниот судски процес и корумпираноста на судството, како и за дискриминацијата на Евреите во тогашното француско општество, енергично барајќи од францускиот државен врв обнова и ревизија на целокупниот процес во кој иако невин, бил осуден капетанот Алфред Драјфус.
Во 1894 година Драјфус бил осуден на доживотна робија поради наводно оддавање на воени тајни на Германија. Афера која експлодирала како политички скандал кој ја поделил Франција кон крајот на 19 век.
Имено, тајните служби во 1894 година откриле попис на тајни документи кои некој чиновник сакал да им ги продаде на Германците. За овој чин го обвиниле капетанот Алфред Драјфус иако тој немал никаква врска со тоа. Драјфус бил изведен пред воениот суд каде против него биле измислени докази и по одржаното судење го прогласиле за виновен.
Недолжниот еврејски капетан притоа доживеал јавно понижување и одземање на сите чинови. Била направена цела парада при што луѓето од насобраниот народ почнале да му ги симнуваат еполетите од униформата, па дури и панталоните, така што на крајот останал простум само во сако. По улиците на Париз почнале да се одржуваат протести на кои биле истакнати пароли „Смрт на Евреите“.
Самиот Драјфус по пресудата бил затворен на Пеколниот остров близу Француска Гвајана.
Наговиот адвокат сето тоа му го раскажал на Зола. Вџашен од деталите на целата сторија славниот писател веднаш реагирал објавувајќи го споменатото отворено писмо на насловната страница од весникот „Л’Орор“.
На обновениот судски процес Алфред Драјфус конечно бил прогласен за невин и ослободен од сите обвиненија. По шест години бил унапреден во чин мајор.