Српскиот кошаркар Милош Теодосиќ е пред враќање на европската сцена. Екипата на Лос Анџелес Клиперс го прогласи за вишок во ростерот и му врачи отказ и слобода да трага по нова средина каде ќе продолжи со кариерата.
Капитенот на репрезентацијата на Србија одлета преку барата во летото во 2017 година, но не успеа да остави впечаток како на европските паркети. Првата сезона беше турбулентна за него, ја одигра со доста подеми и падови, па втората ја дочека без особени очекувања што резултира со губење на минутажата кај тренерот Док Риверс.
Теодосиќ беше без настап за клиперси во 2019 година. Последниот го имаше при крајот на декември и дотогаш имаше просек од 3,2 поени и 2,1 асистенција по натпревар.
Веста за отказот на Теодосиќ во Лос Анџелес е на задоволство на голем број на клубови на стариот континент кои посакуваат да го видат во своите редови. Меѓу нив и турски Анадолу Ефес. За трансфер, сепак, ќе мора да почека 48 часа, како што наложуваат НБА правилата, за и дефинитивно да стане слободен играч.