Власта доцни со изградбата на новиот Клинички центар, цели три години. Пред неколку дена министерот Тодоров повторно спектакуларно најави дека изградба ќе започне на пролет идната година, точно тогаш кога објектот требаше да биде пуштен во употреба. Тоа се нови четири години на кои треба да чекаат граѓаните за да добијат нова зграда и подобри услови за лекување. Овој пат мора да се сериозни! И за да не излезе како приказната со овчарот и волкот, предизборно го распишаа тендерот. Отворањето на понудите министерот за здравство Никола Тодоров го најави на 5 декември, неколку дена пред избори.
Зарем мислат дека имаме амнезија и сме заборавиле се што кажале и ветувале во изминатите три години. Се криеле и деталите за изградбата на новиот Клинички центар за кој еве сега излегува, лажеле дека е започнат процесот на реализација на објектот. И сега пак од почеток. Целокупната инвестиција ќе чинела 128 милиони евра, а изградбата 68 милиони евра, најави министерот Тодоров. Тоа значи 60 милиони евра повеќе од претходно? Дали е ова ново задолжување во Банката на советот на Европа? Или тука се калкулирани сите грешки и промашувања досега? Тоа треба и мора да го објаснат пред граѓаните, зашто тие ќе го исплаќаат кредитот во наредните 10-15 години, а не ВМРО ДПМНЕ.
Кога тоа ќе го расчистиме, има уште нешто многу важно. Да ги вратат парите што и ги дадоа на италијанската фирма Арен Срл за да изработи идеен, основен и главен проект на новиот Клинички центар „Мајка Тереза“. За работата за која не ни соопштија дали ја завршиле, ги искешираа 1, 3 милиони евра. Така беше договорот. На сите прашања врзани за новиот Клинички центар Тодоров одговараше во завиена форма, во стилот„што ви e гајле на вас“, или избегнуваше да одговори. Дали е завршен и прифатен тој проект или одново ќе се проектира, никој досега не излезе да објасни.
Некои можеби се сеќаваат кога пишував за скандалите поврзани со новиот Клинички центар во јануари минатата година. Други можеби воопшто не прочитале или не ги интересирало бидејќи беше во екот на новогодишните празници, славеле, имале поважна работа од тоа да се заморуваат како се трошат нивните пари.
Ќе ве потсетам малку. Серија корупциски скандали се врзани за главниот архитект и сопственик, сега член на бордот на директори на Арен Срл ,Антонио Савоино кој бил два пати апсен за работи поврзани со проектирање на болници во Италија . Поранешниот масон, како што го нарекуваат италијанските медиуми, и е добро познат на италијанската јавност како човек кој добивал големи провизии од локални болници и така се стекнал со капитал и монопол во проектирање и изградба на болници и домови за стари луѓе. Значи, човекот е многу познат, за корупциските скандали поврзани со него се расправало и во италијанскиот парламент.
Како баш тој го доби меѓународниот тендер? Дали македонските власти знаеле за минатото на човекот на кого му ја доверија изградбата на најголемиот објект во македонското здравство со површина од 61 500 метри квадратни? Дали е возможно да не знаеле ништо за неговото минато, кога податоците за него се лесно достапни на интернет? На овие прашања Тодоров, никогаш не одговори. Ниту тој, ниту Владата.
Но, приказната не застанува тука. Пипките на октоподот се рашириле и во земјава. Освен двете фирми од Македонија со кои настапи италијанската Арен Срл, излезе дека имало и трета фирма која во јавноста воопшто не беше спомната. Фирмата Студио Круг ДООЕЛ била регистрирана како друштво за трговија и услуги, во време кога земала учевство во конзорциумот. Подоцна истата фирма е пререгистрирана во „изградба на станбени и нестамбени згради“, и тоа случајно или не, во период кога почнав да се распрашувам за неа. Во Централен регистар стои дека е регистрирана на двајца сопственици, едниот од Кочани, другиот од Тетово, ама излезе дека има трет кој раководи со проектот. Тој третиот во телефонски разговор, збунето ми објаснуваше дека имале ангажирано 20 луѓе кои треба да работат на проектот, кога го прашав дали имаат капацитет за изградба на таков грандиозен објект. Замрсено, заплеткано!
Ете, тоа се фирмите со кои ќе го градат најголемиот објект во јавното здравство. Дали се сериозни? Дали сме ние свесни што ни се случува? Или можеби уште сме заслепени од златните и платинести копчиња во лифтовите со кои ќе не разнесуваат низ новиот Клинички центар. Убавини!
Министерот Тодоров пред две години дури не убедуваше дека 95 проценти од работите со проектот се завршени.
„Идејното решение заврши, рушењето на старата зграда заврши, во над 95 проценти е завршено проектирањето и се прави ревизија. Банката на Советот на Европа го распиша тендерот, првата фаза заврши, а по евалуацијата се очекува да почне втората фаза. Очекуваме кон крајот на првиот квартал да започне изградбата на новата зграда“, изјави Тодоров пред две години.
Ако завршило проектирањето, зошто Тодоров повторно ги најавува истите работи со повеќе финансиски средства? Колку што можеме да видиме заврши само рушењето на старата зграда на гинекологија, околу која се вртеа и сликаа екс премиерот Груевски и министерот Тодоров. Тоа беше најлесниот дел. Потоа ископаа дупка која стои така трета година по ред, се полни со вода, снег, кал и преставува потенцијална опасност за луѓето. Добро што едно време, се сетија да го заградат просторот.
Но, да се вратиме во сегашноста. Во очи на предизборието без срам и перде се појави министерот Тодоров и повторно ни ги кажа истите работи за кои зборува неколку години со ред. Потоа пред камерите на провладините медиуми, се изредија директори на неколку клиники, па дури и претседателот на Лекарската комора. Ги гледам даваат изјави за новиот Клинички центар и зборуваат во минато време за проблемите, како да е веќе изграден новиот објект. Што би било, кога ќе биде. Сте ја читале бајката „Заспаната убавица„? Е, па нешто слично. Само што по три години сите ние се разбудивме без нов Клинички центар, а директорите уште спијат и сонуваат дека поминуваат низ топли ходници. Ако ја раскажат бајката добро, можеби ќе добијат по уште еден мандат. Ако не, ќе остане Тодоров сам да ја раскажува. И така секои четири години, по луѓе, по пријатели. Предизборна бајка за новиот Клинички центар! Од навика.
