Предлог-стратегијата за родова еднаквост 2021-2026 денеска беше разгледувана во Комисијата за еднакви можности на жените и мажите во Законодавниот дом.
„За унапредување на родовата еднаквост треба сите активно да придонесуваме, бидејќи е клучна за демократијата и просперитетот на нашето општество“, рече пред пратениците министерката за труд и социјална политика Јованка Тренчевска.
„Нашите активности ги насочивме кон постигнување на родова еднаквост во кое жените и мажите, девојчињата и момчињата, имаат еднакви права, пристап до ресурси, можности и заштита во сите сфери на животот, како услов за целокупен и одржлив економски, демографски и социјален развој напредок на земјата. Градиме општество во кое жените и мажите ќе ги имаат истите привилегии и одговорности кои ќе ги остваруваат во вистинско заедничко партнерство“, рече министерката Тренчевска.
Тренчевска очекува до крајот на годината Законот за родова еднаквост да ја помине собраниската процедура.
„Министерството ќе продолжи да работи на креирање политики и мерки за вработување кои ќе ја намалат неактивноста на жените на пазарот на трудот, политики кои го регулираат родителското отсуство, заштита на работното место, флексибилно работно време и работа со скратено работно време и работни места за мајки, како дел од измени и дополнувања на Законот за работни односи“, рече Тренчевска.
Целта на Стратегијата е да се унапреди родовата еднаквост, во согласност со меѓународните стандарди, препораки и обврски.
Со донесувањето на Стратегијата, Република Северна Македонија се насочува кон интегрирање на родовата перспектива во политиките и сузбивање на стереотипите како што се, насилството кон жените, унапредување на положбата во јавниот и приватниот живот, образованието, здравството, земјоделието, правдата, социјалната сигурност, животната средина и климатските промени, спортот, културата, медиумите.
Предлог-стратегијата за родова еднаквост 2021-2026 ја помина амандамнската расправа и Комисија за еднакви можности на жените и мажите, ја проследи во понатамошна собраниска процедура.