Заедно со избирачкиот список, медиумите продолжуваат да бидат најгорливиот проблем во рамки на работните групи за спроведување на Договорот од Пржино. Вчерашниот предлог на владејачката партија ВМРО ДПМНЕ за поставување партиски уредници во јавниот сервис наиде на жестоки реакции во еснафската јавност.
Претседателката на ССНМ (Самостоен синдикат на новинари и медиумски работници) Тамара Чаусидис во врска со предлогот за партиски уредници (еден предложен од ВМРО ДПМНЕ и еден од СДСМ) коментира дека „Поделбата на јавниот сервис според партиска припадност, назначување уредници по партиска линија е исто како да предложите операциите на хирургија да ги извршуваат еден лекар од СДСМ и еден од ВМРО“.
Другиот контроверзен предлог на власта доаѓа преку предлог закон за информативни и рекламни кампањи во медиумите. Власта предлага озаконување на владиното рекламирање и принцип на поделба на средствата според гледаност. За претседателот на ЗНМ (Здружението на новинари на Македонија) овој предлог не е ништо друго освен намера за законско претворање на медиумите во огласни табли на владата.
„Преку наводни информативни кампањи, власта со парите на граѓаните планира да ја легализира корупцијата во медиумите со цел да ги контролира. Законот предвидува власта да ги финансира медиумите, но за возврат тие да не ги критикуваат нејзините политики. И во медиуми каде ќе има некаква критика, таа ќе се преклопува со агресивни кампањи за наводните големи успеси на владата“, напиша Селмани на социјалните мрежи.
Помеѓу другите предлози е оној кој предвидува време на политичките партии во јавниот сервис согласно добиените гласови на избори.
Работните групи на четирите партии кои го спроведуваат Договорот од Пржино досега веќе требаше да изнајдат решенија за медиумите прифатливи за професионалната и граѓанска јавност, а во согласност со препораките од Извештајот на Прибе.
„Медиумите треба да се дистанцираат од партиските политики и не треба да бидат во служба на политичарите и политичките партии. Јавниот национален сервис треба да настојува/да вложува напори да биде комплетно непристрасен и независен од политички, комерцијални и други влијанија и идеологии да допинесе кон информирано граѓанство“, се вели во делот со препораки од извештајот.
Прибе во извештајот се осврнува и владините реклами кои служат како средство за поткуп на медиумите.
„Купувањето политичка поддршка од медиумите преку финансиско поддржување на медиумскиот пазар е неприфатливо. Строги правила за владиното рекламирање мора да бидат применети/наложени/наметнати. Медиумското сопствеништво и медиумското финансирање треба да биде транспарентно“.