Собранието доцна попладневно ја започна расправата за избор на државен јавен обвинител, но таа по половина час беше прекината, а како што рече спикерот Талат Џафери, нејзиното продолжение ќе биде дополнително закажано, најверојатно на средината на декември, бидејќи од понеделник почнува расправата за предлог буџетот, која според Деловникот ќе трае околу две недели.
По оваа точка зборуваа само претставникот на предлагачот, заменик министерот за правда Оливер Ристевски и координаторот на една од пратеничките групи на ВМРО ДПМНЕ Илија Димовски.
Ристевски образложувајќи го предлогот на Владата Љубомир Јовески д абиде нов државен јавен обвинител, рече дека тој има богата професионална кариера во казненото право и има позитивно мислење од Советот на јавни обвинители. Тој рече дека Јовески е без петно во кариерата, со силни морални и етички квалитети, целата кариера ја градел во правосудните органи, што според Ристевски се гаранција за успешно извршување на функцијата пред која се наметнуваат, како што рече, големи предизвици.
Илија Димовски рече дека нема да ги коментира персоналните карактеристики и рече дека ќе зборува за дефектот во системот за избор на јавен обвинител. Според Димовски требало да се направи реформа и изборот да биде по нови правила.
-Во дух на еуфорија, нереформирањето на оваа област пред избор на на нов јавен обвинител е поголем проблем за вас и за новиот јавен обвинител. Да направевме реформа заедно прифатливо за целото општество, макар бил и истиот човек, ќе влезеше со многу поголема доза на пренесен кредибилитет и доверба и слобода на искажување на професионалноста во својата работа, рече Димовски.
Претходно без расправа беше изгласан Законот изменување и дополнување на Законот за здравствено осигурување. Во досегашниот тек од 22-та седница се донесени и Законот за изменување на Законот за акциза, Законот за придонеси од задолжителното социјално осигурување.