Очајните настапи на Лестер во Премиерлигата се пресликаа и во ФА купот. Популарните „лисици“ на Клаудио Раниери загубија кај третолигашот Милвол со 1:0 во натпревар од осминафиналната фаза.
Фаворитот речиси цело второ полувреме имаше фудбалер повеќе по исклучувањето на стоперот на домашните, Купер во 52 минута. Екипата од „Кинг Пауер“ стадионот создаде неколку прилики за гол, но затаи реализацијата, па казна за промашувањата стигна во 90 минута преку Камингс.
Манчестер сити, пак, ќе мора повторно да се поти против Хадерсфилд. Денешното гостување кај членот на англиската Чемпионшип конкуренција заврши без голови и „граѓаните“ ќе мора да одиграа уште 90 минути на „Етихад“ за прогрес меѓу осумте најдобри во ФА купот во оваа сезона.
Пеп Гвардиола и Клаудио Раниери изведоа комбинирани состави против Хадерсфилд, односно, Милвол. Нивната намера веројатно беше да ги сочуваат главните адути за претстојните осминафиналните средби во Лигата на шампиони, но тоа не е никакво оправдување за двата тима, особено за Лестер кој е актуелен првак на Англија.
ФА куп
Осминафинале
Милвол – Лестер 1:0
Мидлсборо – Оксфорд 3:2
Хадерсфилд – Манчестер сити 0:0
Барнли – Линколн 0:1