Не е надвор од протоколот членови на семејства да присуствуваат на ауденција кај папата Франциск и да се одаде почит по повод свеченостите во чест на 24 Мај,  Денот на сесловенските просветители браќата Кирил и Методиј во Рим, одговори премеирот Димитар Ковачевски на седницата за пратенички прашања, а во врска со придружбата на македонската делегација во која беше и неговата ќерка Тамара Ковачевска.

– Не постои пречекорување на протоколот, беше најавено дека ќе бидам придружуван од мојата ќерка, тоа е во согласност со протоколи за посета на папа. Историјата познава многу такви случаи на аудиенција во Ватикан. Дали ќе оди сопружник, сопружничка или друг член на семејство, зависи од изборот на државникот. Со тоа се искажува чест и почит кон домаќинот, а така било и за поранешни претседатели и премиери. Не постои никаква двосмисленост, туку уште еден начин да се оддаде почит, додаде премиерот Ковачевски кој наведе дека и многу странски државници кога одат на чествување кај папата се случувало да бидат придружувани од членови на своите семејства.

Пратеникот од ВМРО-ДПМНЕ Драган Ковачки рече дека не треба децата на политичарите да се фрлаат во политичкиот ринг алудираќи на неоснованите реакции по социјалните мрежи во врска со придружбата на ќерката на премиерот во Ватикан, но инсистираше премиерот да одговори на пратеничкото прашање од неговата партија што ќе преземе и дали ќе бара одговорност од собранискиот претседател Талат Џафери за искажаните навреди кон вработените во законодавниот дом.

Инаку, на ауденција кај папата поранешниот премиер Зоран Заев беше со својата сопруга Зорица, а претходно поранешниот претседател Ѓорге Иванов со сопругата Маја Иванова.

С.М.