Европската комисија препорачува старт на преговори за Македонија, но таа препорака е условена со резултати од мартовскиот договор помеѓу ВМРО ДПМНЕ и СДСМ, препораката зависи директно од тоа дали ќе се формира анкетната комисија за расчистување на инцидентите од 24 Декември, дали ќе се продолжи дијалогот со новинарите и склучувањето на меморандумот за соработка помеѓу партиите.
Ова е се накусо заклучоците од пролетниот извештај за напредок кој денес попладнето беше презентиран во Брисел. Еврокомесарот за проширување Штефан Филе на прес конференцијата рече дека не е задоволен од тоа како тече имплементацијата на договореното помеѓу партиите од Март.
-Има напредок во однос на реформите. Но, изразувам загриженост дека договорот од 1 март кој помогна да се надмине кризата е далеку од имплементиран и ги повикувам политичарите ушпте од мојата последна посета да направат екстра напори за да ја покажат нивната заложба за спроведување на договореното од овој договор, фирмирањето на анкетна комисија, меморандумот за разбирање и продолжување на дијалогот со новинарите, истакна Филе.
Во однос на меѓусоседските односи, Штефан Филе рече дека разговорите кои се во тек околу новиот предлог на Нимиц за името претставува нов импулс кој дава надеж дека овој предлог ќе доведе до решение.
-Во однос на проблемот со името, минатата недела имаше нов предлог од медијаторот на Обединетите нации во разговори со двете страни во Њујорк, со надеж дека ова може да доведе до договор, рече Филе.
Генерално, извештајот констатира напредок во областите, а најголемите критики се на адреса на слободата на медиуми.
-Околу заложбите од договорот од 1 Март дека Владата треба да го врати дијалогот со новинарите се уште ништо не е постигнато. Довербата мора да се врати, пишува во извештајот.
Внимание е посветено и на новиот закон за медиуми во кој комисијта констатира дека нема вклученост на сите засегнати страни во носењето на законот.
-Суштински е процесот во однос на носењето на нова регулатива за медиумите да биде инклузивен и да ги вклучува сите страни. Нема напредок во однос за зголемувањето на транспарентноста на владините реклами.
-Има постојани грижи околу самоцензурата, сиромашните работнички права и пристапот на јавноста до објективно известување. За време на изборите набљудувачите забележаа небалансирано известување од страна на јавниот сервис и приватните ТВ станици.
Институциите се пофалени за брзата и ефикасна реакција во однос на протестите околу назначувањето на новиот министер за одбрана, но исто така, се забележува дека за време на изборите е промовирана националистичка реторика.
Во втората половина на јуни Советот ќе одлучува во однос на препораката на Комисијата за почеток на преговори.