Лидерот на ДУИ Али Ахмети утре пристига во Атина на средба со шефот на грчката дипломатија Никос Коѕиас. Со него одат и вицепремиерот за Рамковен договор, Муса Џафери, и вицепремиерот за евроинтеграции, Фатмир Бесими. Ова не е прва средба на Ахмети со официјални претставници на Атина, а ниту пак, прва средба на грчки и македонски претставници од која се очекуваат поместувања во спорот за името.
Но, оваа како и сите други средби од овој тип се чини дека секогаш го постигнуваат истиот исход – нема поместувања во спорот за името, но има политички драми во изобилство. Овојпат, кавгата се распламти околу тоа кој кого ќе претставува во Атина. Ахмети смета дека тој и владините фунцкинери во Атина одат официјално, државата му врати дека се претставувал себеси.
Министерството за надворешни работи вчера во изјава за новинската агенија „Мета“ соопштува Ахмети и фунционерите во Атина не одат во својство на владини претставници, туку дека станува збор за партиска средба и оти владиниот коалициски партнер не се координирал со нив во врска со темите за разговорите.
„Посетата на лидерот на ДУИ, Али Ахмети и владините функционери на Атина е приватна и партиска исто колку што беше партиска посетата на министерот за надворешни работи Никола Попоски“, реагираат денеска од ДУИ.
„На средбата утре ќе се дискутира единствено за спорот со името и за конкретните идеи. Во наредниот период додека Македонија има преодна влада, е најдобар начин да се направи поместување во спорот со името“, стои во соопштението од ДУИ.