Австриската Влада преговара со земјите од Западен Балкан за отворање центри за протерување на илегални мигранти, пишува виенскиот весник „Пресе“.
Весникот тврди дека Виена „веќе преговара“ со Скопје, Белград, Тирана и Приштина за отворање „кампови за протерување на лицата кои во Австрија добиле негативен одговор на барањата за добивање азил, а кои пристигнале преку балканската рута“.
Тие лица, според „Пресе“, треба да бидат времено сместени во некоја „помалку атрактивна земја“ за мигрантите.
Весникот наведува дека земјите од Западен Балкан за возврат бараат пари, а Виена моментно ги разгледува и правните можности.
Во протерувањето треба да помогне и Фронтекс, но за тоа мора да биде променет мандатот на оваа агенција на ЕУ.
Засега не е познато колкава ќе биде големината на планираните кампови за протерување на Балканот, пишува „Пресе“, додавајќи дека тој проект е поддржан од Данска и Холандија.
Вчера високата претставничка за надворешна и безбедносна политика на Европската Унија Федерика Могерини, одговорајќи на новинарско прашање за идејата да се отворат кампови за бегалци на Балканот, порача дека ЕУ треба да работи со постојниот модел.
– Имаме систем со Либија и мислам дека може да биде корисен модел, да се поддржи и консолидира. Базиран е на соработка со властите на самото место, агенцијата на ОН и земјата на потекло. Моделот дава резултати и не мислам дека ни е потребен нов инструмент. Треба да инвестираме повеќе ресурси да го консолидираме овој механизам, кој дава резултати веќе шест месеци – изјави Могерини.
Данскиот премиер неодамна предложи да се отворат бегалски кампови „во Европа, но надвор од ЕУ“ алудирајќи, според дипломатски извори, на Западниот Балкан. Австрија изрази поддршка за данската идеја, но таа не е формализирана.
Управувањето со миграцијата и изнаоѓањето решение за овој посебно сензитивно политичко прашање во ЕУ ќе биде една од главните теми на следното австриско претседателство од 1 јули.