По четврт век музицирање и снимање плочи, Британците The Charlatans утре официјално ќе го издадат 12-от по ред студиски албум насловен Modern Nature. За оние што подзаборавиле кои се The Charlatans ќе потсетиме дека тоа се момчињата (сега веќе длабоко во петтата деценија од животот) кои во 1990 година го имаа огромниот хит The Only One I Know, рок-песна, која заедно со Fool’s Gold на уште полегендарните The Stone Roses, сѐ уште може да се чуе во некои од скопските клубови или на сѐ поретките домашни рок-журки.
И двете песни се издадени во 1990 година кога токму The Charlatans заедно со The Stone Roses, Happy Mondays, Inspiral Carpets и со уште неколку рок-состави беа дел од таканаречената Madchaster сцена. Madchaster e кованица од зборовите Mad – што значи лудо и Manchester, британскиот град кој беше центарот на оваа музичка сцена.
Како и другите Madchaster-бендови така и The Charlatans музички се изградија врз оставштината на The Smiths, постпанкерите The Fall па и врз творештвото на едни New Order, а нивниот звук може да се опише како местото каде се допираат алтернативниот рок, психоделијата и електронската денс-музика.
Бендот смени неколку од оригиналните членови, а првиот клавијатурист Роб Колинс загина уште во 1995 година во сообраќајна несреќа, додека тапанарот Џон Брукс почина пред две години откако му беше дијагностициран тумор на мозокот.
Нему и му е посветена новата плоча Modern Nature и затоа на овој албум бендот не работи со нов тапанар туку местото на Брукс го пополнуваат Пит Селисбури член на The Verve и Стевен Морис од New Order. Иако албумот официјално излегува утре, тој уште денеска може да се преслуша на јутјуб-страницата на The Charlatans од каде ние ви го пренесуваме во боксот од почеток на текстов.
Хитот од 1990 година, The Only One I Know: