Koнтроверзниот индиски бизнисмен Субрата Рој, кој во својата земја се гони за криминали ја заврши неколкудневната посета на Охрид, каде најави инвестиции од една милијарда евра во различни области- сточарството, туризмот, па дури и филмската индустрија.
Што се однесува до инвестицијата во агрокомбинатот „Џумајлија“, Субрата Рој најави дека за три години планира да вложи 200 милиони евра, а и информираше дека е доставена банкарската гаранција со која 100 процентно ја потврдува инвестицијата.
Во интервју за 24 вести, Субрата Рој се соочи со мали проблеми околу конверзијата на валутите, пресмета колку всушност е неговиот капитал, со кој најавува инвестициски бум, за кој и тој и владејачката ВМРО-ДПМНЕ добија критики од опозициската СДСМ.
Сепак и покрај богатството, на Субрата Рој му е потребно земјиште во Македонија и најверојатно нема лесно да го реализира проектот кај Љубаниште, Охрид, каде заедно со македонските власти најавува градење на луксузен комплекс, со оглед на спротивставените изјави кои за НОВА ги дадoa Министерството за култура и Владиката Тимотеј.
И двете страни ја спорат сопственоста на земјиштето и тврдат дека е нивно и дека тие располагаат со правата и оттука со (не)можноста да му се продаде на контроверзниот бизнисмен, кој во неговата матична земја Индија се гони за криминали и проневери и во моментов тамошниот суд пресуди враќање на долг од 4,38 милијарди долари.
Владиката Тимотеј во петокот за НОВА изјави дека “нема намера ниту да дава, ниту да подарува земјиште, ниту пак дека некој го прашал за земјиштето”, додавајќи дека “не може власта, односно Министерството за култура да дава нешто што не е нивно”. Што се однесува до Субрата Рој, Владиката Тимотеј го карактеризира со зборовите- “тој е обичен мангуп”.
Од друга страна пак, Министерството за култура за НОВА изјави дека спорното земјиште “не е црковно, туку државно” и оттука, Република Македонија се води како сопственик.
Освен тоа, на Рој и окрај богатството, бесплатно ќе ја добие градежната парцела за споменик Мајка Тереза со површина од 621 метри квадратни спроти споменикот „Воин на коњ“ .
Одлуката за подарување на атрактивната локација во строгиот центар на Скопје ја донело Министерството за култура, а истата веќе е публикувана во Службен весник.