Повредените поради сериозноста на повредите веднаш се пренесени на скопските клиники, а мотивот за престрелката ќе се утврдува. Две лица на 36 и на 37 години од Тетово имале прострелни рани во абдоменот, тие се оперирани и се во стабилна состојба. Третото лице на 49 години, исто така од Тетово поради тешките повреди на главата се наоѓа во кома центарот на Клиниката за неврохиругија.
Јавниот обвинител издаде наредби за прибирање и вештачење на трагите пронајдени на лице место, за вештачење на пронајденото оружје (еден пиштол) и муниција, како и за вештачење на возилото пронајдено на местото на престрелката.
По наредба на јавниот обвинител, на сите инволвирани во инцидентот ќе им бидат земени парафински ракавици заради проверка на присуството на барутни честички, а ќе се проверува и присуството на алкохол во нивната крв. Портпаролот на СВР Тетово, Марјан Јосифовски за МИА изјави дека пукотниците биле пријавени во МВР во 2 часот и 20 минути по полноќ. На улицата „29 ноември“ во Тетово каде што се случила престрелката, бил пронајден пиштол марка „зброевка“, рамка со осум куршуми и пет чаури. Пронајдено е и патничко возило „мерцедес“ со тетовски таблички.