Паднало од креветче, го истепале роднините на сопругот кој е во затвор или пак најверојатно монструмот е пријателот на сопругот со кого живеела. Вакви контрадикторни искази дала 20 годишната мајка на 14-месечното бебе кое викендов беше примено на КАРИЛ во коматозна состојба. Докторите од Карил сведочат дека не виделе такво ѕверство. Детето има скршеници на двете нозе, крвавење во мозокот и скршеница на челната коска. Се претпоставува дека и претходно било малтретирано, бидејќи скршениците на нозете се стари две до три недели, исто колку и старата повреда на мозокот – пренесува „Либертас“.
Се чека истрагата да открие кој кошмар го преживувало ова бебе. Детето е преземено од социјалните служби и му е одреден старател. А од Министерството за труд потврдуваат дека мајката е во нивна евиденција како социјален случај, но нема информација зошто службите потфрлиле и во овој случај. Денеска состојбата на бебето е релативно стабилна, не е на апарати за дишење, но сеуште е во животна опасност.
„Детето е подобро, сè уште немаме контакт со него, но дише само, не е на апарати. Има рефлекс на цицање, јадење, што е добар знак. Доколку во наредните 48 часа има подобрување ќе биде префрлено на Детска хирургија. Веројатно се работи за повреди од човечка природа и било повредувано неколку пати – изјави д-р Маја Мојсова, раководител на Клиниката за анестезија, реанимација и интензивно лекување – КАРИЛ.
Истрагата на МВР е сеуште во тек. Од таму велат дека случајот е многу чувствителен и дека најпрвин ќе расчистат што се случило, пред да кажат детали.
„Во соработка со другите институции работат на целосно расчистување на случајот и откако ќе биде расчистен ќе ги информираат соодветно обвинителството и јавноста.“-изјави Тони Ангеловски портпарол на МВР.
Од Основното јавно обвинителство чекаат што ќе покаже истрагата на МВР.
„По дадени насоки од Основното јавно обвинителство, Министерството за внатрешни работи интензивно работи за утврдување на идентитетот на сторителот на кривичното дело, како и за обезбедување на релевантни докази кои ќе го поткрепат случувањата на кривично правниот настан.- велат од ОЈО.
Од Министерството за труд и социјална политика пак велат дека преку службите за социјална работа ги преземата сите потребни мерки.
„Со повеќе информации ќе излеземе по затворањето на истрагата.Она што можеме да го соопштиме во моментот е дека мајката на детето е корисник на парична помош на лице кое до 18 години возраст имало статус на дете без родители и родителска грижа.“- соопшти МТСП.
Тешко повреденото девојче во ургентниот центар пред два дена го донесе неговата мајка, која исто така била претепана но без сериозни повреди, по што е пуштена дома.