Деветтото издание на „Скупи Фестивалот“ беше затворено синоќа со грузискиот театар „Нодар Думбадзе“ и претставата „1945“.
Вкупно осумте претстави кои беа прикажани во текот на шест дена во рамки на фестивалот, беа проследени од страна на тричленото жири во состав Рози Костани – претседател на жирито и членовите, Тодор Кузманов и Сулејман Рушити, кои едногласно ја доделија Гранд-при наградата за најдобра театарска претстава на „Духот кој оди (Патот на Прометеј)“ од Дејан Дуковски, во режија на Александар Поповски и продукција на Српското Народно Позориште од Нови Сад, Србија.
Според жирито, се работи за театарско остварување кое се одликува со актуелност и ангажираност во претставувањето на моралните дилеми на човекот во современиот свет. Режијата е минуциозна и аналитична, при што врз основа на драмскиот текст создава цврста театарска структура, а актерската игра е на високо професионално ниво.
Покрај наградената претстава, годинава големо внимание привлекоа и претставите „Шопинг & факинг“ од Марк Равенхил во режија на Фатос Бериша, подготвена како копродукција меѓу Националниот театар на Косово и „Урбан театар“ од Приштина, и претставата „Куќата на гневот“ во режија на Диана Добрева во изведба на театарот „Взраждане“ од Софија, Бугарија.