Специјалниот известувач на ОН за унапредување и заштита на правото на слобода на изразување, Франк Ла Ру, кој треба да направи извештај за состојбите со слободата на мислење и изразување во земјата денеска се појави во Основниот суд 2 на судењето за клевета Мијалков против Фокус.
Со оглед на тоа дека рочиште немаше бидејќи се одложи, Ла Ру ја искористи приликата да поразговара со адвокатите, како и тужените новинари Јадранка Костовоа и Владо Апостолов. Специјалниот известувач изрази загриженост поради овој процес против новинарите и истакна дека не би требало новинарите да страдаат за изјави на трети страни, односно во случајов тужителот ги тужи медиумот и новинарите поради пренесена изјава на екс-амбасадор.
-Многу сум заинтересиран за судењето на Фокус бидејќи е врзано со слободата на изразувањето за што треба да се заинтересирани сите. Медиумите не треба да бидат одговорни за пренесување на информации од трети страни, а третата страна може да биде самата одговорна за изјавите, истакна Ла Ру.
Специјалниот претставник е заинтересиран и за случајот со притворениот новинар Томислав Кежаровски. Побарал да поразговара со него во притворот во Шутка, но надлежните не му дозволиле.
-Вистина е дека јас дадов барање за да го посетам новинарот Кежаровски, но бев одбиен. Повеќе детали за овој случај, како и за оценката за состојбите со медиумите Ла Ру рече дека ќе презентира во петок на прес конференција во хотелот Холидеј Ин.
На судењето дојдоа и набљудувачи од мисијата на ОБСЕ, Американската амасада во земјава, Хелсиншкиот комитет за човекови права, ЗНМ и ССНМ.
Освен случајот со тужбите на Апостолов и Костова, како и притворот на Кежаровски, Ла Ру бил заинтересиран за повеќе детали и за смртта на Никола Младенов.