Нервозата меѓу граѓани расте откако камиони од македонската асоцијација на превозници целосно го блокираше граничниот премин кон Косово, во знак на револт по воведувањето на забрана за увоз од Македонија од страна на косовската влада.
Билјана Муратовска, претседател на Макамтанс со апел – проблемот мора итно да се реши меѓу двете влади.
Превозниците, како што јави Вести24, велат дека блоката ќе остане цела вечер.
Патничките возила со потешкотии го заобиколуваа камионот кој попречно беше поставен на патот кон граничниот премин Блаце, но подоцна беше остранет. Автобускиот превоз беше во целосен прекин.
„Косово нема да ги укине мерките за забрана на увоз на производи од Македонија се додека Македонија не ги укине воведените мерки“, изјави косовската министерка за трговија и индустрија Мимоза Кусари Лила, по разговорите со македонскиот министер за економија, Валон Сарачини.
Министрите изјавија дека и двете влади остануваат посветени на решавањето на проблемите меѓу двете земји и на повторно воспоставување нормални трговски односи. Сарачини имал средба и со косовскиот министер за финансии, Бесим Беќај, по што изјави дека македонската влада е заинтересирана за што поскоро надминување на настанатата ситуација, бидејки тоа е од интерес и на економиите и на граѓаните на двете земји.
Во согласност со релевантните служби во Приштина, Македонија на Косово извезува стока во вредност од 300 милиони евра, додека извозот на Косово во Македонија, изнесува само 17 милиони евра.
Приштинските медиуми го објавија написот на скопскиот весникот “Дневник” дека македонската влада сериозно размислува за воведување на визите за граѓаните на Косово.
И премиерите на земјата, Хашим Тачи и Никола Груевски синоќа, како што е соопштено од страна на приштинските медиуми, телефонски разговарале за решавање на овие проблеми, но не постигнаа договор.