Груба демонстрација на сила и ароганција, вака Иницијативниот одбор за ослободување на новинарот Томислав Кежаровски ја оцени одлуката на истражниот судија да го продолжи притворот за нови 30 дена. Во присуство на претставницие на мисијата на ОБСЕ кои одблиску го следат случајот Кежаровски иницијативниот одбор на денешната прес конференција ги изнесе своите ставови околу продолжувањето на притворот,но ги најави идните чекори околу заложбите за правда за колегата Кежаровски на кој веќе му тече вториот месец зад решетки во Шутка поради напишан текст во кој властите го товарат дека пред пет години открил заштитен сведок.
Иницијативниот одбор најави посета кај Народниот правобранител Иџет Мемети, а од него ќе побараат да го испита случајот и да ја провери состојбата на Кежаровски во притвор.
– Од контактите со семејството знаеме дека психичката состојба на колегата Кежаровски е многу тешка, тој не може да се помири со фактот дека лежи во ќелија поради напишан текст, а дополнителен товар е и тешката егзистенционална и материјална состојба на неговите две малолетни деца и сопругата, забележа главниот и одговорен уредник на весникот „Нова Македонија“ Зоран Димитровск
– По сите реакции и сите укажувања од меѓународните и домашни релевантни институции и организации навистина не може поинаку да се протолкува освен како груба демонстрација на сила и ароганција, вели претседалката на ССНМ Тамара Чаусидис.
Насер Селмани, претседателот на Здружението на новинари и Билјана Петковска, директорот на МИМ истакнаа дека не прејидицираат дали Кежаровски е виновен или не, но дека притворот е неоснован, а мерката само дополнително ќе ги заплаши новинарите и ќе ги влоши состојбите во медиумите.
Новинарката Јадранка Костова рече дека од нејзиното искуство не се сеќава на друг ваков случај кој предизвикал толку многу реакции во меѓународните новинарски организации.
– Од сето ова досега лесно може да се прогнозира дека и натаму ќе тераат 30 по 30 дена притвор и лесно е да претпостави дека ваквото однесување ќе биде причина Македонија да забележи уште поголем пад на сите меѓународни индекси на слобода, рече Костова.
Иницијативниот одбор се уште чека одговор од Делегацијата на ЕУ во РМ по повиците од Репотерти без граници да го осуди притворот на Кежаровски и да разговара со сите чинители во институциите околу овој случај.