Вкупно 27-мина се приведени за инцидентите кои во петокот попладнето и саботата напладне се случија во Скопје, се вели во сопштението на МВР.
Вчера, според МВР, повредени се 13 граѓани, над 10-тина полицајци и двајца пожарникари. Меѓу повредените има и четворица со тешки повреди.
Меѓу приведените се и две лица од Прилеп и Скопје кои според полицијата се организатори на петочниот протест.
Според портпаролот на МВР, Иво Котевски, “полицијата и натаму работи на откривање на учесниците во инцидентите врз основа на објавените снимки во медиумите и на социјалните мрежи”.
Протестите против именувањето на Талат Џафери за министер за одбрана почнаа во петокот, а во саботата имаше контрапротести. Приведените ќе одговараат за кривичното дело учество во толпа.
Оштетени биле 8 приватни автомобили и 4 полициски возила, од кои две нови “шкода јети”.
Каменувани биле два автобуси на ЈСП, бр. 61 и 63, а подоцна автобусот 61 беше запален.
Инцидентите вчера продолжиле и доцна вечерта со каменување на автобуси – бил каменуван автобусот 67 во село Моране, три автобуси во Жорче преполни со патници кои оделе на конвенцијата на една политичка партија. Потоа во 22,00 часот во Драчево е скршено стакло на автбус, истото се случило и во автобус во Автокоманда. Во Пинтија околу 23,00 часот скршена е шофершајбна на автобус бр. 70.