Чешката полиција ја продолжува истрагата за смртта на палестинскиот амбасадор во Прага, кој загина вчера при експлозија во неговата резиденција.
Според соопштението на полицијата, како што јави дописникот на МИА од Прага, експлозијата била предизвикана од експлозивна направа што се активирала кога амбасадорот Џамал Мохамед Џамал се обидел да го отвори сефот во неговата куќа.
Вчерашните информации во врска со користењето на сефот се разликуваа. Палестинскиот министер за надворешни работи Ријад ал-Малики излезе со информации дека трезорот кој експлодирал не бил користен повеќе од две децении.
Подоцна, портпаролот на палестинската Амбасада Набил Фахил објасни дека имало два трезора и дека тој што експлодирал се користел редовно за дневни потреби. Експлозивот не бил дел од безбедносниот систем на сефот.
Чешката полиција негираше дека се работи за терористички чин, додека палестинските власти не ја исклучија можноста за тоа.
Не е соопштено ниту за каков експлозив се работи иако се појавија информации дека се работи за Семтекс, пластичен експлозив создаден во 50-тите години на минатиот век во поранешна Чехословачка.