8 милиони евра чини опремувањето на новиот Археолошки музеј, кој се наоѓа во новиот објект на Уставниот суд, на кејот на Вардар.
Ангажирана за набавка и монтажа на витрините за музејските експонати, видеонадзорот, комплетната инсталација и друго е фирмата „Бетон“ од Штип, која и единствена доставила понуда на тендерот, што го распишало Министерството за култура.
Според податоците на Бирото за јавни набавки, договорот, Министерствто за култура го склучило на 8 милиони евра за „изведување на градежно занаетчиски работи со ентериерна обработка за музејска поставка“, како што стои во документот. Истовремено, Министерството потпишало договор и со Градежниот институт „Македонија“ да врши надзор при опремувањето.
Градежен Институт Македонија А.Д. 82 081 евра
ГТД Бетон – Штип 8 092 414 евра
Од Министерството за култура објаснуваат дека тие се задолжени за реализација на градежно-занаетчиските работи со ентериерна обработка за музејска поставка за делот од објектот, а избраната компанија има обврска целосно да го опреми Музејот.
„Тоа значи опремување на музејската поставка со специјално изработени витрини за чување на археолошките и музејските експонати, опремување на музејскиот простор со аудио и видеосистеми, видеонадзор, поставувања на облоги на подовите, плафоните и ѕидовите (со сите неопходни браварски, столарски, молеро-фарбарски, подополагачки и керамичарски услуги), целосно поставување на комплетната инсталација и опрема во делот на термотехника, електротехника, хидротехника, ППЗ, како и набавка на мебел и опрема потребни во музејската поставка“, велат од Министерството за култура .
Според Никола Наумовски од невладината „Плоштад Слобода“ – ова најново трошење на Министерството за култура не е изненадувачко.
„Ние, зградите од Скопје 2014, ги нарекуваме кулиси на корупцијата. Ако се има предвид дека само за изградба на зградата на Уставниот суд се потрошени 25 милиони евра, колку што е основниот договор, ако објектот има 7 илјади квадратни метри, тоа значи дека еден квадратен метар на овој објект чини 3, пол илјади евра.
Со овие нови 8 милиони евра значи дека по метар квадратен се потрошени 1150 евра.“, вели Наумовски.