Американската филмска академија, која ја доделува наградата Оскар, го исклучи од своите редови продуцентот Харви Вајнстин, кој последниве денови се соочи со низа обвинувања за силување и за сексуално вознемирување.
Претходно, и Британската филмска академија го исфрли од своето членство.
-Академијата сака да се огради од некој кој не ги почитува своите колеги. На овој начин сакаме да испратиме порака дека ерата на сексуални предатори и на малтретирање на работното место е минато за нашата индустрија. Ова е навистина голем проблем, за кој нема место во општеството, Управниот совет продолжува да работи за воспоставување на етички стандарди на однесување и од сите членови на Академијата се очекува да ги спроведуваат, се вели во соопштението на Академијата, во чиј борд од 54 члена речиси половина се жени.
Филмовите што ги продуцираше Вајнстин добија над 300 номинации за Оскар и освоија 81 статуетка.
Исклучувањето на 65-годишниот Вајнстин од најпрестижната филмска организација следува по објавените текстови во „Њујорк тајмс“ и „Њујоркер“ во врска со низата обвиненија за силување и сексуални вознемирувања, кои датираат уште од 80-те години.
Харви Вајнстин – падот на кариерата на еден моќен филмски продуцент