Кариерата на американскиот продуцент и еден од најпознатите во филмската индустрија, Харви Вајнстин речиси сигурно е завршена откако неделава е во фокусот на секој голем медиум по скандалот во кој актерки, продуцентки и други соработувачи на Вајнстин, го обвинија за силување, полови напади или обиди за сексуално матретирање.

Гвинет Палтроу, Анџелина Џоли, Лиа Сејду, Росана Аркет и уште неколку актерки но и актери го обвинија ко-основачот на продукцијата „Мирамакс“ дека биле предмет на напад.

Најновото обвинување на адреса на продуцентот доаѓа од американската актерка, Рос Мекговен која објави дека била силувана од Вајнстин.

Првичната информација за Харви Вајнстин ја објави „Њујорк Тајмс“, за потоа да се приклучи и „Њујоркер“, по што започна бранот обвинувања од јавни личности кои случувањата ги чувале во тајност, а по што бордот на директори на „Вајнстин компани“, во која се јавува како ко-основач заедно со неговиот брат, одлучи да го отпушти од работа.

Во серија објави на социјалната мрежа „Твитер“, Мекговен освен што го обвини Вајнстин за силување, го обвини и шефот на студиото Амазон, Рој Прајс, дека ја игнорирал кога му кажала за проблемите кои ги имала со продуцентот.

Ова веднаш беше демантирано од еден од најмоќните продуценти во Холивуд.

Полицијата на Њујорк истражува случај поврзан со Вајнстин кој датира од 2004 година, додека полицијата Лондон Метро истражува случај кој датира од 1980.

Обвинувањата за сексуално малтретирање од страна на филмскиот продуцент се проширија во магазинот Њујоркер, кој цитира три жени, односно италијанската актерка Асиа Архенто, поранешната актерка Лусија Еванс и трета жена која е анонимна.

Еден од случаите е сниман аудио.

Во истиот новинарски текст пишува дека уште 10 други жени се довериле кај авторот на текстот, дека од 1990 ди 2015 биле нападнати, или имало обид да бидат нападнати од Вајнстин.

Неговиот првичен коментар беше дека секој сексуален чин бил доброволен и не присилил ниту една од жените кои го обвинуваат.

Во Америка веќе излегоа објави од страна на актерот Бен Афлек кој упати критики кон Вајнстин, потоа  актерот Тери Круз, кој исто така се пожали на „недолично однесување“ од Вајнстин при нивна соработка, како и изјава од Бред Пит, кој го предупредил Вајнстин во минатoтo, никогаш повеќе да нема контакт со тогашната девојка на Пит, Гвинет Палтроу, која се доверила дека имала непријатно искуство со продуцентот.

Последната во низата реакции се јави и Џејн Фонда, која во интервју со Кристиан Аманпур, рече дека знаела за сите маани на Вајнстин.

„Се срамам што никогаш не кажав за тоа“, вели Фонда, која тврди дека таа сепак иако знаела, никогаш не била нападната од продуцентот.

Според Фонда, Харви Вајнстин не е изолиран случај и дека во Холивуд имало и други кои ја злоупотребуваат својата моќ како него.