Од три средни училишта во Струмица, единствено во СОУ„ Димитар Влахов“ немаше екстерно тестирање. Најголем дел од професорите во струмичките училишта штрајкуваат, но дел од нив, како што ги нарекуваат штрајкбрехери, го спроведуваат екстерното тестирање на учениците од четврта година.
„Екстерно тестирање има и го реализираат колегите кои не штрајкуваат, во прашање се седум професори, но тоа според мене е многу контроверзно бидејќи има предметни наставници кои им предаваат на учениците, а истите денеска се тестатори, вели Верица Јанкова, професорка во СОУ„ Јане Сандански“.
Професорката Јанкова додаде уште еднаш дека не се против екстерното, туку против начинот на кој истото се реализира, односно како што вели, со еден тест да се оценува знаењето на учениците и ангажираноста на професорите.
Од училиштето изјавија дека по првата реализирана група на тестирање веќе двајца од професорите кои не ја бојкотирале наставата, се приклучиле кон штрајкот. Во следните два дена до кога е предвидено да се изврши тестирањето, наставниците од СОУ „Јане Сандански“, велат дека ќе продолжат со штрајкот.
Учениците кои веќе беа завршиле со тестирање велат дека екстерното е многу погрешен потег од страна на министерството.
„Прашањата се направени само со цел како да бидат казнети професорите “, вели Анастасија, ученичка од четврта година, која ни кажа дека прашањата можел да ги одговори дури и министерот за образование.
„Имаше прашања кои беа по двапати поставувани и не беа лесни како што беа најавувани претходно, вели ученичка од СОУ, Јане Сандански“.
Во средното техничко училиште „Никола Карев“, исто така осум наставници кои не го поддржуваат штрајкот, денеска го извршуваа екстерното тестирање. Единствено екстерно немаше во СОУ„Димитар Влахов“.
Таму учениците денеска се појавија на екстерното, но поради штрајкот на наставниците истите си заминаа.
Од регионалната подрачна единица на СОНК во Струмица, велат дека законски е казниво доколку наставници се присутни како тестатори, а истите држат предавање по предмет кој се полага на екстерното тестирање.
Денеска за време на тестирањето во сите средни училишта во Струмица беа присутни надворешни лица од Државниот испитен центар за надзор на екстерното тестирање.