Средношколците не се вклучени во одлучувањето во училиштата и не се застапени во нивните органи, а работите одат до таму што многу често професорите назначуваат претседатели на класовите, без учениците да имаат можност да пуштат глас.
Тоа е дел од сознанијата до кои дошло истражувањето за средношколско организирање и учество во Македонија, кое го спровел Младински образовен форум (МОФ). Во истражувањето биле опфатени 54 средни училишта и 155 ученици од 14 градови во Македонија.
При истражувањето на начините на избор на претседатели на класови и генерации, се забележува дека училиштата, претставени преку класните раководители, поставуваат строги и дискриминаторски услови, дозволувајќи им само на редовните, дисциплираните, примерните и учениците со солиден успех да можат да ги застапуваат своите соученици.
Од одговорите на учениците се забележува дека класниот раководител има големо влијание врз изборот на претседател на клас. Сè уште постојат училишта во кои изборот на претседател на клас го врши класниот раководител, со што на учениците директно им се одзема правото да одлучуваат кој ќе ги претставува.
– Најчесто само во прва и втора година, професорите им дозволуваат на учениците сами да си бираат претседател на клас, а потоа откако ќе ги запознаат сите ученици подобро, тие самите го прават тоа – рекол еден од анкетираните средношколци.
Главните забелешки на учениците се за квалитетот на настава, комуникацијата професор-ученик, оценувањето, комуникацијата со стручните служби и со претставниците на учениците, меѓуетничките конфликти и инфраструктурата во училиштата.
Средношколците се разочарани и што отсуствува средношколско организирање на национално ниво. Последните јавни активности на Унијата на средношколци на Македонија и на Средношколската унија на Македонија се забележани во 2008 и 2009 година, преку оградување од протестите против воведувањето државна матура и преку приклучување кон протестите кои студентите ги организираа пред Европската комисија во Скопје, а против одложувањето на датумот за почеток на преговори за членство на Македонија во Европската Унија.