Прогласена е епидемија на мали сипаници на ниво на цела држава, соопштија од Центарот за јавно здравје.
Доктор Владимир Микиќ од Институтот за јавно здравје рече дека прогласувањето на епидемијата е со цел да се спроведат дополнителни мерки за да се спречи натамошното ширење, да се намали бројот на нови инфекции и да се спречат тешките форми на ова заболување.
„ Една од мерките е забраната за посета на градинките, втората мерка која е предложена е да се намали возраста за вакцинирање од 12 месеци на шест месеци, бидејќи голем дел речиси 100 деца се на возраст под една година и тие се најранлива група за тешки форми на заболувањето. Дополнително бидејќи имаме заболени меѓу повозрасните лица кои по редовниот календар не подлежат на вакцинација, Комисијата донесе одлука да се зголеми возраста за вакцинација, така што секое лице постаро од 14 години ќе може слободно да се вакцинира во центрите за јавно здравје односно на возраст од 14 до 60 години, рече доктор Микиќ.
Исто така и сите здравствени работници на територија на цела држава ќе мора да се вакцинираат со две дози на МРП вакцина.
Бројот на заболени од морбили од почетокот на годинава е 961. Најмногу заболени се деца на претшколска возраст. Според податоците на Центарот за јавно здравје околу сто доенчиња на возраст помали од една година заболеле од мали сипаници.
Во моментов хоспитализирани се 55 деца на инфективната клиника и 15 на педијатрија од кои 7 се во тешка здравствена состојба.