Писателката Силвија Митевска утре во Клуб ресторанот МКЦ, со почеток во 20 часот ќе ја промовира својата втора збирка раскази „Шепотот на Данте“.
Промоторки на збирката ќе бидат Елизабета Баковска и Калина Малеска.
Ова е втора збирка на авторката, која во 2015 година ја објави „Додека Данте спие“ и постигна голем успех кај читателската публика.
Збиката раскази е издадена во соработка со издавачката куќа „Или-или“, и е поддржана од Министерството за култура.
– ,,Шепотот на Данте“ содржи девет раскази, кои третираат теми од секојдневието на обичните луѓе. Најчесто главните ликови се жени што трагаат по вистинските вредности и прават смели избори. Како и во првата книга, така и тука, во некои од расказите преовладуваат фантастични, надреални елементи, кои ги прават интересни за читање. Инспирација црпам од секојдневието што нѐ опкружува и од сите навидум мали нешта, кои лесно и невино можат да го сменат теркот на животот, притоа поигрувајќи си со нашата судбина – вели авторката Силвија Митевска.
Професорот и писател Драги Михајловски, кој е рецензент на оваа книга, во своето видување на делото, меѓу другото, ќе напише:
– Расказите на Силвија Митевска на чудесен начин го продолжуваат тематското ткаење почнато уште со првата нејзина збирка раскази „Додека Данте спие“, што имаше убав успех кај читателската публика. Нема сомнеж дека преку постапката на очудување, Митевска го слика нашето секојдневие, но секогаш видено од нејзин специфичен агол, претворено во убава, сугестибилна проза. Во сите девет раскази, авторката излегува од рамките на секојдневното и моќно го надоградува, изненадувајќи нѐ со ефектен крај смислен од оваа наша уникатна раскажувачка – наведува Михајловски.