Веќе една седмица никој не се јавува да го земе женскиот паричник којшто минатата недела чесниот пронаоѓач го донел во полициската станица во Тетово.
Како што веќе објавивме , вечерта на 6 јуни 47-годишен жител на тетовско село, движејќи се низ трговски центар на улица „Маршал Тито“ во Тетово, пронашол изгубен женски паричник и го предал во полициската станица Тетово. Но оттогаш нема ниту трага, ниту глас од сопственикот.
„Паричникот и парите сѐ уште се кај нас и никој не се јавил да го земе во полициската станица. Во новчаникот нема никакви документи, а досега не се случило за ваков личен предмет никој да не се јави и да го подигне. Имало и досега случаи некој да најде новчаник, но сопствениците се јавувале во рок од неколку часа или по ден-два или бидејќи претежно имало лични документи, од полициската станица ги контактирале соствениците. Обично, оние коишто крадат паричници, набрзина ги вадат парите и го фрлаат паричникот, а документите остануваат. Очекуваме сепак да се јави сопственикот на овој паричник, да го препознае и да му го вратиме. Сумата на пари не е астрономска, но за наши прилики е релативно голема“, изјавија за НоваТВ од СВР Тетово.
(Љ.Б.)