Нема да има самит на претседатели на државите од Југоисточна Европа, информираат од кабинетот на претседателот на Македонија Ѓорѓе Иванов, домаќинот на самитот.
Причина – ниту еден од поканетите претседатели во регионов не прифатил да му биде гостин на Иванов.
„За жал, старите балкански предрасуди и комплекси повторно заживеаја во пресрет на самитот. Нема да дозволам преку грбот на Македонија да се прекршуваат старите балкански предрасуди и да се поткусуруваат интересите на балканските држави, а цената да ја плаќа Македонија. Предизвиците се решаваат со дијалог, а не со бојкот“, изјави пред новинарите претседателот Иванов.
Претседателот на Хрватска Иво Јосиповиќ го откажа учеството на самитот на Процесот за соработка во Југоисточна Европа во Охрид, пренесуваат агенциите извори во неговиот кабинет во Загреб.
Учеството на на самитот вчера го откажа и претседателот на Албанија поради тоа што на собирот не е поканета претседателката на Косово. Претходно, претседателот на Бугарија Плевнелиев и шефот на грчката држава- Папуљас, одбија да учествуваат.
Годинашен претседавач на оваа меѓународна организација е Македонија, односно македонскиот претседател.