Просветен инспектор влезе во Основното општинско училиште „Гоце Делчев” од Неготино во чиј двор, според јавно објавената снимка на интернет, беше претепано девојче од други две девојчиња, во присуство на други деца.
На видеото што беше објавено на социјалните мрежи се гледаат две девојчиња како тепаат своја соученичка во дворот на училиштето.
Според директорот, Петар Мантев децата што тепаат всушност биле проблематични и за нив претходно имало изречени мерки.
– Повикани се учениците, изречена им е педагошка мерка, пратени се писма до родителите нивни за да дојдат на советување, известена е и полициската станица, нагласи Мантев.
Видеото предизвика лавина реакции во јавноста. Најголем дел од коментарите се згрозеност од чинот дека учениците гледаат и снимаат, но никој не и помага на нападната тинејџерка.
– Очекуваме Министерството за образование и наука т.е. министерката Рената Десковска да покрене истрага за овој настан, да утврди степен на одговорност и каде потфрлил целиот наставен кадар, дежурни наставници, педагози, психолози, кои треба да работат на превенција на насилството и мора да имаат постојан увид за тоа што се случува во училиштето и училишниот двор, се наведува во реакцијата од „Меѓаши“.
Оттаму апелираат до службите во МОН да ги ревидираат застарените правилници за регулирање на поведението на учениците и да разработат мерки за интервенција при инциденти на насилство во училиштата.
Детската амбасада Меѓаши повикува и на поголема одговорност на родителите и нивна активна улога во превенција на меѓуврсничкото насилство за да не се случи најлошото, а Државниот просветен инспекторат и МВР да го утврдат степенот на одговорност, со казни за сите сторители и соучесници.