Отфрлајќи било каква поврзаност со некој политички субјект, и напоменувајќи дека се работи за интересот на своите деца, над 50 родители денеска попладне се собраа на мирен протест пред училиштето „11 Октомври“ во Скопје.
Тие се незадоволни од тоа што не се сигурни кој ја врши функцијата директор во училиштето, а решение за нивните барања и понатаму нема.
Родителите ги повикаа инситутуциите и централната власт да не си ја префрлаат вината, туку да става приоритет за безбедноста и хигиената во училиштето, бидејќи како што порачаа, кога се работи за децата, политиката треба да се остави на страна.
>> Училишниот одбор изгласа одговорност на директорката Костадинова за случувањата
– Причината поради која што дојдовме овде е да ги повикаме сите надлежни институции од Министерството за образование, од општината, инспекторатите, со малку поголемо внимание да ги донесуваат одлуките, бидејќи се работи за најранлива категорија – децата, вели еден од родителите на децата, дополнувајќи дека без оглед кој ќе седне на директорската функција, родителите ќе го имаат истиот став.
Доколку не биде решена ситуацијата во училиштето „11 Октомври“, тие велат, децата нема да посетуваат настава во оваа образовна институција.
Тие ги повикаа и останатите родители да им се придружат во барањата и покрај тоа што подлежат на притисок на своите работни места доколку излезат на протест.
Како што рекоа, особено се загрижени за случајот со потенцијалното киднапирање, со нехигиената, за случајот со труењето и од постојаните смени на наставници.
Постарите членови од семејствата на децата, пред камерите на медиумите потенцираа дека тие го завршиле своето освновно образование во ова училиште коа било познато по својот квалитет, а денес нема ни персонал кој се грижи за хигиената во него.
– Некој во оваа држава треба да сфати дека сите училишта се јавни и образовни институции. Каде што секој, од директор до наставник треба да работи за едукациајта на децата…политиката надвор од училиштето, порача друг родител пред присутните кои одржаа мирен протест во „11 Октомври“.