„Дачиќ фашист“, „Стоп за српскиот тероризам“ со вакви пароли денеска кон српската амбасада во Скопје се упатија стотина воените ветерани на УЧК предводени од Фазли Велиу.
Сепак кордонот полицајци ги запре пред целта и тие протестот го одржаа на околу 300 метри оддалеченост од амбасадата.
Револтирани поради дискриминаторската политика на Србија кон Албанците, на протестот учествуваа и членовите на Здружението на албанските политички затвореници во Македонија, студенти од тетовскиот Универзитет и граѓани.
Фазли Велиу, поранешниот командант на ОНА одби да зборува на македонски јазик, изјавата ја даде само албанските медиуми.
Сепак на англиски јазик беше прочитано соопштение: „Ужасната сцена беше иста како сцените во време на поранешна Југославија кога албанските региони беа окупирани од Југославија. Ваквото однесување е спротивност со домашните и меѓународните стандарди. Србија презеде антиалбански и антицивилизациски чекори.“
Протестот го обезбедуваа над 200 полицајци, а населбата Водно, каде се наоѓа срспката амбасада, беше речиси целосно блокирана поради сообраќајниот метеж.
Протестот траеше околу еден час, помина без инциденти.
Револтот меѓу Албанците порасна по отстранувањето на споменикот во Прешево посветен на борците на УЧК , како и после посетата на српскиот премиер Ивица Дачиќ во Македонија, кога изјави дека Србија не е банана држава и дека нема да толерира такви постапки.